Breaking News
अठरा तासांच्या अखंड मेहनतीने महापालिकेने
पाली जलाशयाच्या मुख्य जलवाहिनीवरील गळती थांबवली
- पालीकरांना मोठा दिलासा
मुंबई : लोकवार्ता टाइम्स
पाली जलाशयाच्या बांद्रा रेक्लेमेशन इनलेटवर मेहबूब स्टुडिओ येथे ६०० मि.मि.व्यासाच्या जलवाहिनीची मोठी गळती होऊन हजारो लिटर पाणी वाया जात होते. बृहन्मुंबई महानगरपालिकेचे अतिरिक्त महानगरपालिका आयुक्त ( प्रकल्प) पी.वेलरासू यांच्या आदेशान्वे जल अभियंता विभागाच्या सहाय्यक अभियंता जल कामे (तातडीचा दुरुस्ती विभाग) वरळी यांनी सहाय्यक अभियंता जल कामे -परिमंडळ (प.उ.-द.) यांच्या मार्गदर्शनानुसार दुरुस्ती कामास तातडीने सुरूवात सुरू केली. महपालिकेच्या कर्मचाऱ्यांने पाणी पुरवठा प्रभावित न करता १८ तास अखंड राबून गळती दूर केली. यामुळे लाखो लिटर्स पाण्याची बचत झाली. तसेच यामुळे पालीकरांना मोठा दिलासा आहे.
जल पुरवठ्याचे पाणी सर्वच बाजूने येत असल्याने आणि काँक्रीट रोड असल्यामुळे गळती शोधणे अवघड जात होते. गळती शोधक पथकाने आधुनिक यंत्राच्या सहाय्याने जमिनीखालील १२ फूट खोल गळती अचूकपणे शोधले. दुरुस्ती विभागाने जेसीबीचा वापर करून खोदकाम हाती घेतले .
या ठिकाणी महानगर टेलिफोन, टाटा, रिलायन्स, अदाणी, महानगर गॕस आदी कंपन्यांच्या उच्च दाबाच्या केबल्सचे जाळे पसरलेले आहे. त्यातून अत्यंत काळजीपूर्वक खोदकाम पालिकेचा जल विभागाच्या कर्मचाऱ्यांनी केले. कारण गळतीचे पाणी या केबल्सच्या चेंबरमध्ये जात होते. धोका टाळण्यासाठी संबंधित यंत्रणांना विश्वासात घेऊन, आवश्यक ती पूर्ण खबरदारी घेऊन या केबल्स काही ठिकाणी कापाव्या लागल्या तर काही ठिकाणी बंद कराव्या लागल्या.
दसरा सण असताना कोणत्याही प्रकारे पाणी पुरवठा खंडित न होता, वाहतुक सुरळीत ठेवून हे काम १८ तास कुठल्याही खंडाशिवाय पूर्ण करण्यात आले. परिसरातील आणि इमारतीमधील नागरिकांना कोणत्याही स्वरूपाचा त्रास होणार नाही याचीही विशेष काळजीही घेण्यात आली. प्रभावित जलवाहिनी सापडल्यावर आणि निरीक्षण केल्यावर तिच्या तळाला दोन ठिकाणी मोठी गळती निदर्शनास आली. अत्यंत कुशलतेने त्या ठिकाणी प्रथम लाकडी खुट्या ठोकल्या.