Breaking News
२४ प्राईम व्हिजन न्युज
मुंबई तील परळ विभागातील केईएम रुग्णालयाला मुख्यमंत्री एकनाथ शिंदे यांनी अचानक भेट देऊन येथील परिस्थितीचा आढावा घेतला आणि रुग्णांशी संवाद साधला.
रुग्णालयातील सामान्य विभागासह अतिदक्षता विभागात उपचार घेणाऱ्या रुग्णांशी देखील संवाद साधून त्यांना मिळत असलेल्या उपचारांची माहिती एकनाथ शिंदे यांनी घेतली. तसेच त्यांना कोणत्याही बाबतीत गैरसोय होते अथवा नाही हेदेखील जाणून घेतले.
केईएम रुग्णालयात गेल्या काही दिवसांपासून बंद अवस्थेत असलेले सहा वॉर्ड शिंदे यांनी देखील यावेळी पाहिले. ते बंद ठेवण्यामागे नक्की काय कारणे आहेत ते जाणून घेऊन हे विभाग तात्काळ सुरू करण्याचे निर्देश मुंबई महानगरपालिकेच्या अधिकाऱ्यांना दिले. रुग्णांना उत्तम सोयी सुविधा उपलब्ध करून देणे ही आपल्या सर्वांची जबाबदारी असून त्यात कोणताही निधी कमी पडू देणार नाही असे याप्रसंगी स्पष्ट केले. रुग्णालयात काही ठिकाणी उघड्यावर दिसणाऱ्या विद्युत वाहिन्या नीट झाकण्याचे निर्देश यासमयी दिले. तसेच रुग्णांना देण्यात येणाऱ्या दुधाच्या दर्जाबाबत काहींनी प्रश्न उपस्थित केल्याने रुग्णांना तात्काळ चांगल्या दर्जाचे दूध उपलब्ध करून द्यावे असेही मुंबई महानगरपालिकेच्या अधिकाऱ्यांना बजावले.
केईएम रुग्णालय हे मुंबईतील 97 वर्ष जुने आणि नावाजलेले रुग्णालय असल्याने येथील सोयी सुविधा उत्तम दर्जाच्या असाव्यात अशी अपेक्षा शिंदे यांनी यावेळी व्यक्त केली. तसेच रुग्णालयातील बंद असलेले सहा वॉर्ड पुन्हा सुरू झाल्यास 450 अधिक बेड्स रुग्णांसाठी उपलब्ध होऊ शकतील त्यामुळे या रुग्णालयावरील ताण बऱ्याच अंशी कमी होऊन जास्तीत जास्त रुग्णांना उत्तम वैद्यकीय सेवा मिळेल यासाठी हे वॉर्ड लवकरात लवकर पूर्ण क्षमतेने सुरू करावेत असे निर्देश संबंधित अधिकाऱ्यांना दिले.
https://youtu.be/Y_fIy_CSbIk
रिपोर्टर