Breaking News
जोगेश्वरी पूर्वमध्ये मनोरंजनासह प्राचीन सांस्कृतिक माहिती देणारे अनोखे शिल्पग्राम उद्यान सर्वांसाठी खुले
- बारा बलुतेदार पद्धती, प्राचीन कला आणि खेळ यांची शिल्प, संगीत कारंजे, सांगीतिक जॉगिंग ट्रॅक, खुला रंगमंच यामुळे उद्यानाच्या लोकप्रियतेत वाढ
मुंबई : लोकवार्ता टाइम्स
धावपळीच्या जीवनामध्ये निवांतपणा आणि विरंगुळा शोधण्यासाठी येणाऱ्या नागरिकांचे मनोरंजन करण्यासह त्यांना प्राचीन संस्कृतीचे दर्शनही घडविण्याची किमया बृहन्मुंबई महानगरपालिकेच्या उद्यान विभागाने साधली आहे ती जोगेश्वरी (पूर्व) स्थित मातोश्री मीनाताई ठाकरे शिल्पग्राममध्ये. बारा बलुतेदार कार्य पद्धती, प्राचीन खेळ, कला अशी विविधांगी सांस्कृतिक माहिती देणारे हरित केंद्र म्हणून शिल्प ग्रामची ओळख बनली आहे.
जोगेश्वरी (पूर्व) येथे जोगेश्वरी विक्रोळी जोड मार्गावर पुनम नगर परिसरात तब्बल ५५ हजार चौरस मीटर क्षेत्रावर मातोश्री मीनाताई ठाकरे शिल्पग्राम हे उद्यान फुलले आहे. मात्र ते निव्वळ उद्यान नाही तर सांस्कृतिक वारसा उलगडून दाखवणारे हरित केंद्र देखील आहे. या ठिकाणी बारा बलुतेदार, प्राचीन खेळ, नृत्य यांची शिल्प आहेत. महाराष्ट्राच्या आणि देशाच्या प्राचीन संस्कृतीचे दर्शन घडविणारे बारा बलुतेदार यांची घरे, त्यांच्या कामाचे स्वरूप, प्राचीन खेळ आणि नृत्य परंपरा यांची शिल्प पाहताना मुले आणि वडीलधारी देखील हरखून जातात. इतिहासातील माहिती शिल्प रूपामध्ये पाहून मुलांना सांस्कृतिक आकलन करणे सहज सोपे तर ठरतेच, समवेत विरंगुळ्यातून शिक्षण देखील मिळते.