Breaking News
२४ प्राईम व्हिजन न्युज
भारतीय पुरुष हॉकी संघाने एशियाडमध्ये सुवर्णपदक जिंकले: पॅरिस ऑलिम्पिकसाठी पात्र ठरले
मुंबई : गुरुदत्त वाकदेकर
भारतीय पुरुष हॉकी संघाने हँगझोऊ आशियाई क्रीडा स्पर्धेत इतिहास रचला आहे. सुवर्णपदक लढतीत भारताने 2018 च्या सुवर्णपदक विजेत्या जपानचा 5-1 असा पराभव केला. या विजयासह टीम इंडियाने तब्बल नऊ वर्षांनंतर या खेळांमध्ये हॉकीमध्ये सुवर्णपदक पटकावले आहे. 2014 च्या इंचॉन आशियाई स्पर्धेत भारताने शेवटच्या वेळी आशियाई क्रीडा स्पर्धेत सुवर्णपदक जिंकले होते.
विशेष, 2014 पूर्वी भारतीय पुरुष हॉकी संघाने 1966 आणि 1998 च्या आशियाई क्रीडा स्पर्धेत सुवर्णपदक जिंकले होते. चार सुवर्णांव्यतिरिक्त, टीम इंडियाने 1958, 1962, 1970, 1974, 1978, 1982, 1990, 1994, 2002 आशियाई क्रीडा स्पर्धेत रौप्यपदक जिंकले होते, तर 1986, 2010 आणि 2018 च्या आशियाई क्रीडा स्पर्धेत कांस्यपदक पटकावले होते. सुवर्ण जिंकण्यासोबतच भारतीय हॉकी संघ 2024 मध्ये पॅरिस येथे होणाऱ्या ऑलिम्पिकसाठीही पात्र ठरला आहे.
भारताने जपानवर दणदणीत विजय मिळवला आहे. भारताने दुसऱ्या क्वार्टरमध्ये पहिला गोल केला. यानंतर तिसऱ्या क्वार्टर आणि चौथ्या क्वार्टरमध्ये भारताने प्रत्येकी दोन गोल केले. भारताकडून मनप्रीत सिंग ( 25वे मिनिट ), अमित रोहिदास ( 36वे मिनिट ), कर्णधार हरमनप्रीत सिंग ( 32वे मिनिट ) आणि अभिषेक ( 48वे मिनिट ) यांनी गोल केले. जपानसाठी तनाका सेरेनने एकमेव गोल केला.
मध्यंतरापर्यंत भारत 1-0 ने आघाडीवर होता. पहिल्या क्वार्टरमध्ये दोन्ही संघांना एकही गोल करता आला नाही. भारताला काही पेनल्टी कॉर्नरही मिळाले, मात्र गोल करण्यात अपयश आले. दुसऱ्या क्वार्टरच्या 25व्या मिनिटाला भारताने पहिला गोल केला. माजी कर्णधार मनप्रीत सिंगने रिव्हर्स हिटवर गोल करत भारतीय संघाला 1-0 अशी आघाडी मिळवून दिली.
तिसऱ्या क्वार्टरच्या 32व्या मिनिटाला कर्णधार हरमनप्रीत सिंगने पेनल्टी कॉर्नरवर ड्रॅग फ्लिकसह उत्कृष्ट गोल केला. यासह भारताची आघाडी 2-0 अशी झाली. यानंतर 36व्या मिनिटाला अमित रोहिदासने पेनल्टी कॉर्नरवर ड्रॅग फ्लिकसह उत्कृष्ट गोल करत भारताची आघाडी 3-0 अशी वाढवली.
चौथ्या क्वार्टरच्या 48व्या मिनिटाला अभिषेकने मैदानी गोल करत टीम इंडियाची आघाडी 4-0 अशी वाढवली. यानंतर 51व्या मिनिटाला जपानच्या तनाका सेरेनने पेनल्टी कॉर्नरवर ड्रॅग फ्लिकसह गोल केला. यानंतर 59व्या मिनिटाला कर्णधार हरमनप्रीतने ड्रॅग फ्लिकवर आणखी एक शानदार गोल नोंदवत भारताचा विजय जवळपास निश्चित केला. यानंतर दोन्ही संघांना एकही गोल करता आला नाही. अशा प्रकारे टीम इंडियाने हा सामना 5-1 असा जिंकून सुवर्णपदकावर कब्जा केला.
पूल फेरीतही दोन्ही संघ आमनेसामने आले. त्यावेळी भारताने जपानचा 4-2 असा पराभव केला. उपांत्य फेरीत भारताने दक्षिण कोरियाचा 5-3 असा तर जपानने चीनचा 3-2 असा पराभव केला. कोरियाने कांस्यपदक जिंकले. तिसऱ्या स्थानासाठी झालेल्या सामन्यात त्यांनी चीनचा 2-1 असा पराभव केला.
भारतीय संघ संपूर्ण स्पर्धेत अपराजित राहिला. सध्या सुरू असलेल्या आशियाई क्रीडा स्पर्धेत भारतीय संघ जबरदस्त फॉर्ममध्ये आहे. त्याने ग्रुप स्टेजमधील पाचही सामने जिंकले. टीम इंडियाने ग्रुप फेरीत 58 गोल केले होते. त्यांच्याविरुद्ध केवळ 5 गोल झाले. भारताने उपांत्य फेरीतही 5 गोल केले. मात्र, दक्षिण कोरियालाही 3 गोल करण्यात यश आले. भारताने अंतिम फेरीत 5 गोल केले आणि त्यांच्याविरुद्ध 1 गोल होऊ शकला. म्हणजे संपूर्ण स्पर्धेत भारताने 68 गोल केले आणि त्यांच्याविरुद्ध फक्त 9 गोल झाले. 2023 च्या आशियाई क्रीडा स्पर्धेत भारतीय पुरुष हॉकी संघाचा प्रवास पाहूया:-
पहिला सामना: उझबेकिस्तानचा 16-0 असा पराभव.
दुसरा सामना: सिंगापूरचा 16-1 असा पराभव केला.
तिसरा सामना: जपानचा 4-2 असा पराभव केला.
चौथा सामना : पाकिस्तानचा 10-2 असा पराभव.
पाचवा सामना: बांगलादेशचा 12-0 असा पराभव.
उपांत्य फेरी: दक्षिण कोरियाचा 5-3 असा पराभव.
अंतिम: 2018 आशियाई क्रीडा स्पर्धेतील चॅम्पियन जपानला 5-1 ने पराभूत केले.
रिपोर्टर